MLSning navbatdagi turida «Filadelfiya Yunion» o‘z maydonida «Inter Mayami»ni qabul qildi. Chester shahridagi «Subaru Park» stadionida o‘tgan uchrashuv 2:2 hisobidagi durang bilan yakunlandi.
Mezbonlar 11-daqiqada Indiana Vassilevning goli evaziga hisobni ochdi. Oradan 10 daqiqa o‘tib, «Inter Mayami» Daniel Pinterning goli bilan muvozanatni tikladi.
26-daqiqada Lionel Messi mehmonlarni oldinga olib chiqdi. Argentinalik hujumchi uchun bu 2026 yilgi Jahon chempionatidan keyin «Inter Mayami» safidagi ilk gol bo‘ldi. Shuningdek, Messi otasi Xorxe vafotidan keyin jamoasi uchun birinchi marta gol urdi. Luis Suares esa golli uzatma muallifi bo‘ldi.
«Filadelfiya Yunion» ikkinchi bo‘limda hisobni yana tenglashtirdi. 58-daqiqada Nil Pyer jamoasiga 2:2 hisobini qaytardi.
Uchrashuv oxirida har ikki jamoa bir nafardan futbolchisini maydondan chetlatdi. «Inter Mayami»da Brayt 90+12-daqiqada, «Filadelfiya»da esa Sallivan 90+14-daqiqada qizil kartochka oldi.
Shu tariqa, «Filadelfiya Yunion»ning ketma-ket to‘rtta g‘alabadan iborat seriyasi uzildi. «Inter Mayami» esa MLSda g‘alaba qozona olmayotgan o‘yinlar seriyasini uchtaga yetkazdi. Jamoa bundan oldin «Kolambus Kryu» bilan durang o‘ynagan va «Neshvill»ga mag‘lub bo‘lgan.
Keyingi turda «Inter Mayami» 23 avgust kuni «Toronto» mehmoni bo‘ladi. Shu kuni «Filadelfiya Yunion» o‘z maydonida «Ostin»ni qabul qiladi.
«Filadelfiya Yunion» — «Inter Mayami» 2:2
AQSH — MLS
20 avgust 2026 yil. Chester, «Subaru Park» stadioni
Gollar: 11' — Indiana Vassilev (1:0), 21' — Daniel Pinter (1:1), 26' — Lionel Messi (1:2), 58' — Nil Pyer (2:2)
Qizil kartochkalar: 90+12' — Brayt («Inter Mayami»), 90+14' — Sallivan («Filadelfiya Yunion»)
