"Vilyarreal"ning gruziyalik hujumchisi Jorj Mikautadze "Barselona" safiga o‘tishi mumkin edi. Bu haqda insayder Ekrem Konur xabar berdi.

Manba ma’lumotiga ko‘ra, "Barselona" 25 yoshli futbolchining transferi bo‘yicha "Vilyarreal"ga murojaat qilgan. Biroq ispan klubi hujumchi uchun 70 million yevro talab qilgan. Ta’kidlanishicha, "ko‘k-anorranglilar" yuqori narx sabab transferdan voz kechgan.

O‘tgan yozda "Vilyarreal" Mikautadzeni "Lion"dan 31 million yevroga sotib olgan edi. Gruziyalik hujumchi ispan klubi safida barcha musobaqalar doirasida 43 ta uchrashuvda maydonga tushib, 15 ta gol urdi va 7 ta golli uzatmani amalga oshirdi.

Mikautadzening "Vilyarreal" bilan amaldagi shartnomasi 2031 yilga qadar mo‘ljallangan.