Fransiya futboli gegemoni «PSJ» Opta superkompyuteri hisob-kitoblariga ko‘ra 67 foiz ehtimol bilan yangi mavsumda ham chempionlikni qo‘lga kiritadi. Parij klubining mavsumni 11-o‘rindan pastda yakunlash ehtimoli esa mutlaqo 0,0000 foizga teng deb baholandi.

Titul uchun ikkinchi asosiy da’vogar sifatida «Lans» ko‘rilmoqda — yaqindagina ushbu klub Fransiya Superkubogi uchun kechgan bahsda «PSJ»ni mag‘lub etgan edi. «Lans»ning chempionlik imkoniyati 9,8 foizga teng.

Qizig‘i shundaki, «Lion»ning chempionlik imkoniyatlari «Lill»nikidan biroz yuqoriroq baholandi (4,4% va 4,3%), vaholanki o‘tgan mavsum yakunlariga ko‘ra «lionliklar» jadvalda raqibidan ortda qolgan edi. Shunga o‘xshash holat «Monako» va «Marsel» o‘rtasida ham kuzatildi — knyazlik klubining imkoniyati 3,4 foiz, «Marsel»niki esa 3,3 foizni tashkil etmoqda.