Madridning «Atletiko» klubi 22 yoshli yarim himoyachi David Garsiya bilan shartnoma imzolaganini e’lon qildi.

Ispaniyalik futbolchi «Kadis»ni tark etgach, «Atletiko» safiga erkin agent maqomida qo‘shildi. Tomonlar o‘rtasidagi shartnoma 2027 yil 30 iyunga qadar amal qiladi.

«Bu katta klub bilan shartnoma imzolash imkoniyati hammaga ham nasib qilavermaydi. Juda xursandman. Oldimga qo‘yilgan maqsadlarga erishish uchun ishtiyoq va katta xohish bilan keldim», — dedi Garsiya.

David o‘tgan mavsumni ijara asosida «Ibisa» safida o‘tkazdi. U Primera Federasion va Ispaniya kubogida jami 27 ta uchrashuv o‘tkazib, shularning 23 tasini asosiy tarkibda boshladi va 1 ta gol urdi.

Transfermarkt portali futbolchining bozor qiymatini 100 ming yevroga baholamoqda.

Garsiyaning «Atletiko»da dastlab zaxira va yosh futbolchilardan tashkil topgan tarkibda o‘zini ko‘rsatishi kutilmoqda.