«RB Leypsig» Kristofer Nkunkuni jamoaga qaytarishi mumkin. BILD ma’lumotiga ko‘ra, nemis klubi «Milan»ning 28 yoshli fransiyalik hujumchisini ijaraga olish bo‘yicha kelishuvga yaqin turibdi.

Nkunku 2019 yildan 2023 yilgacha «Leypsig» sharafini himoya qilgan. U klub safida barcha musobaqalarda 172 ta o‘yin o‘tkazib, 70 ta gol urgan va 56 ta golli uzatmani amalga oshirgan. Futbolchi faoliyatining eng yaxshi davrini aynan Germaniyada o‘tkazgan va 2022/23 yilgi mavsumda Bundesliganing eng yaxshi to‘purari bo‘lgan.

Ayni paytda Nkunku «Milan»ning asosiy tarkib futbolchilari qatoriga kirmayapti. Shu sababli u «Leypsig»ga qaytish variantini ko‘rib chiqmoqda.

Nemis klubi hujum chizig‘ini kuchaytirishga jiddiy ehtiyoj sezmoqda. «Leypsig» «Kyoln» futbolchisi Said El-Mala transferi bo‘yicha kelishuvga erisha olmadi. «Strasbur»dan Diyego Moreyrani xarid qilish rejasi ham amalga oshmadi — portugaliyalik futbolchi 50 million yevro evaziga «Milan»ga o‘tdi.

Bundan avval «Xoffenxaym» hujumchisi Fisnik Aslani transferi ham tibbiy ko‘rik natijalari sabab amalga oshmay qolgandi.

Germaniyada yozgi transfer oynasi 1 sentyabr kuni yopiladi.