«Aston Villa» «Milan» vingeri Rafael Leau transferi bo‘yicha muzokara olib bormoqda.

Insayder Janluka Di Marsio ma’lumotiga ko‘ra, Angliya klubi «rossonerilar»ga bitimning ikki variantini taklif qilgan.

Birinchi variant — 42 million yevro va qo‘shimcha 3 million yevro bonus evaziga to‘g‘ridan-to‘g‘ri transfer. Ikkinchi variant esa 8 million yevroga ijara va keyinchalik 42 million yevroga majburiy sotib olish shartini o‘z ichiga oladi.

27 yoshli futbolchining kelajagi yaqin soatlar ichida hal bo‘lishi mumkin.

Rafael Leauga Turkiyaning «Galatasaroy» klubi ham qiziqish bildirmoqda. Mish-mishlarga ko‘ra, Istanbul klubi portugaliyalik futbolchi uchun taxminan 44 million yevro taklif qilgan.

Transfermarkt ekspertlari Leauning bozor qiymatini 50 million yevroga baholamoqda. Uning «Milan» bilan amaldagi shartnomasi 2028 yilga qadar mo‘ljallangan.