«Inter» hujumchisi Franchesko Pio Espozito Milan klubi bilan yangi shartnoma imzoladi. Bu haqda Football Italia xabar bermoqda.

Manba ma’lumotiga ko‘ra, 21 yoshli forvard seshanba kuni 2032 yil yoziga qadar mo‘ljallangan yangi kelishuvni rasmiylashtirgach, klub ofisini tark etgan.

Espozitoning «Inter» bilan avvalgi shartnomasi 2030 yilga qadar amal qilardi. 2025/26 yilgi mavsumdagi muvaffaqiyatli o‘yinlari uchun futbolchining maoshi sezilarli darajada oshirildi.

Italiyalik hujumchi o‘tgan mavsum barcha musobaqalar doirasida 10 ta gol urdi va 6 ta golli uzatmani amalga oshirdi. Shuningdek, u Italiya milliy terma jamoasi tarkibidan ham muqim o‘rin egalladi.

Joriy mavsum boshida Espozito A Seriyada 2 ta o‘yin o‘tkazib, 1 ta gol va 1 ta golli uzatma qayd etdi. Har ikki uchrashuvda ham u jamoa sardori Lautaro Martines bilan birga asosiy tarkibda maydonga tushdi.