Nikolas Talyafikoning "Atletiko"ga transferi La Ligadagi maosh limiti sabab to‘xtab qoldi. Bu haqda Mark Meshenua xabar berdi.
Ma’lumotga ko‘ra, Madrid klubi belgilangan muddat ichida moliyaviy hisob-kitoblarini talab darajasiga keltira olmagan va shu sabab Ispaniya chempionati tomonidan belgilangan maosh limitidan oshib ketgan.
Ushbu ma’muriy muammo "Atletiko"ga argentinalik himoyachini ro‘yxatdan o‘tkazish va transferni rasman yakunlash imkonini bermagan.
Tomonlar kelishuvga erishgan bo‘lishiga qaramay, La Liganing moliyaviy qoidalari transferni oxiriga yetkazishga to‘sqinlik qildi.
Endi "Atletiko" mazkur operasiyani tasdiqlatish uchun o‘z moliyaviy ko‘rsatkichlarini chempionat belgilagan limit doirasiga qaytarishi kerak.
Ayni paytda erkin agent maqomida bo‘lgan Talyafiko Madrid klubining himoya chizig‘ini kuchaytirishi kutilgan edi.
Biroq "Atletiko"ning La Liga moliyaviy talablariga moslasha olmayotgani sabab transfer hozircha so‘roq ostida qolmoqda.
