«Yuventus» yarimhimoyachisi Tyon Kopmeynersni sotmay, jamoada olib qolgani to‘g‘ri qaror bo‘lgan, deb hisoblaydi sobiq futbolchi Paolo Podji.

Kopmeyners Turin klubiga «Atalanta»dan katta mablag‘ evaziga o‘tgan bo‘lsa-da, o‘tgan ikki mavsumda o‘z imkoniyatlarini to‘liq namoyish eta olmadi. Shu bois «Yuventus» yozgi transfer oynasida niderlandiyalik futbolchidan voz kechish variantini ko‘rib chiqqan, ammo munosib taklif topilmagani sababli uni tarkibda saqlab qolgan.

Podjining ta’kidlashicha, Kopmeynersning salohiyati ma’lum va klub uni sotish o‘rniga imkoniyatlarini to‘liq namoyon etishi uchun to‘g‘ri yo‘lni topishi kerak. «Yuventus» sifatli futbolchilarni saqlab qolib, ularni jamoaga moslashtirishga harakat qilishi lozim, shuning uchun Kopmeynersni olib qolgani yaxshi qaror bo‘ldi, deydi u.

Endi futbolchi yangi mavsumda o‘zini ko‘rsatish va Turin klubida asosiy tarkibdan joy olish uchun yana bir imkoniyatga ega bo‘ladi.