«Inter» va Argentina terma jamoasi hujumchisi Lautaro Martines 2026 yilgi jahon chempionatidagi ishtirokini baholadi.
«Neradzurri» sardori Ispaniyaga qarshi boy berilgan finaldan tashqari, Argentina terma jamoasining mundialdagi barcha o‘yinlarida maydonga tushdi. Hujumchi musobaqa davomida 3 ta gol urdi va 1 ta golli uzatmani amalga oshirdi.
«Albatta, doim imkon qadar ko‘proq o‘ynashni xohlaysiz. Ammo Argentina terma jamoasida haqiqiy chempionlar va juda yuqori saviyadagi futbolchilar ko‘p. Men murabbiyning tanlovini hurmat qilaman. O‘ylaymanki, jahon chempionatini juda yaxshi o‘tkazdim.
Men uchun 2022 yil Qatardagi jahon chempionatidan keyin o‘zimni oqlash juda muhim edi. O‘sha musobaqaga eng yaxshi holatda bormagan edim. Bu safar esa imkoni boricha yaxshi tayyorlandim, ayniqsa ruhiy jihatdan», — dedi Lautaro.
Eslatib o‘tamiz, Argentina terma jamoasi JCH-2026 finalida Ispaniyaga minimal hisobda mag‘lub bo‘lgan edi.
