FIFA AQSH sudidan UYEFAning FIFA Forward Enterprise loyihasi bilan bog‘liq hujjatlarni ochib berish haqidagi talabini rad etishni so‘radi. Bu haqda The Athletic xabar berdi. Nashr qo‘liga FIFA tomonidan Nyu-York sudiga taqdim etilgan materiallar kelib tushgan.
Avvalroq UYEFA Jahon chempionatiga bo‘lgan huquqlarning bir qismini xususiy investorlarga sotish ehtimoli bilan bog‘liq hujjatlarni taqdim etishni talab qilgan edi. Yevropa tashkiloti ushbu talabni FIFA prezidenti Janni Infantinoning ehtimoliy jinoiy ishi bilan bog‘lagan.
FIFA UYEFAning harakatlarini tashkilot va uning rahbariyatiga qarshi kampaniyaning bir qismi deb hisoblamoqda. Federasiya shuningdek, hozircha bunday jinoiy ish mavjud emasligi va UYEFA uni boshlash vakolatiga ega emasligini ta’kidladi.
Bundan tashqari, FIFA UYEFAni loyihani amalga oshirishga to‘sqinlik qilishga urinishda aybladi. Tashkilot fikricha, kichik futbol assosiasiyalariga qo‘shimcha mablag‘ ajratilishi rivojlanayotgan mamlakatlar raqobatbardoshligini oshirishi va Yevropa futboli ta’sirini susaytirishi mumkin.
