Ozarbayjon Premyer-ligasining 4-turida "Sabah" o‘z maydonida "Zira"ni qabul qilib, 5:0 hisobida yirik g‘alabaga erishdi.

Mezbonlar uchrashuv taqdirini amalda birinchi bo‘limdayoq hal qildi. 7-daqiqada Shimich hisobni ochgan bo‘lsa, 13-daqiqada Mikels penaltidan ustunlikni oshirdi. 30-daqiqada u yana bir bor raqib darvozasini ishg‘ol qilib, dubl qayd etdi.

Aynan "Sabah"ning uchinchi golida O‘zbekiston milliy jamoasi yarim himoyachisi Umarali Rahmonaliyev assistentlik qildi. Hamyurtimiz uchrashuvni asosiy tarkibda boshlab, 65-daqiqada zaxiraga olindi.

Ikkinchi bo‘limda ham "Sabah" hujumkorlikni pasaytirmadi. 51-daqiqada Nvachukvu hisobni 4:0 ko‘rinishiga keltirgan bo‘lsa, 57-daqiqada Mikels uchinchi golini urib, xet-trikni rasmiylashtirdi — 5:0.

"Sabah" chempionatdagi uchinchi o‘yinida uchinchi g‘alabasini qo‘lga kiritib, 9 ochko bilan turnir jadvali peshqadamiga aylandi. Jamoa raqiblariga nisbatan bir o‘yin kam o‘tkazgan. "Zira"da ham 9 ochko bor, ammo to‘plar nisbati bo‘yicha ikkinchi o‘rinda. "Zira" mazkur bahsgacha chempionatdagi dastlabki uch uchrashuvining barchasida g‘alaba qozongan edi.