Ayni kunlarda O‘zbekiston U-23 terma jamoasi Milliy futbol markazida Osiyo o‘yinlari musobaqasi oldidan so‘nggi tayyorgarlik yig‘inlarini o‘tkazmoqda. Bugun O‘FA rahbariyati U-23 olimpiya terma jamoamiz a’zolari bilan uchrashdi.
Suhbatda jamoa oldida turgan ushbu musobaqa haqida fikr bildirilar ekan, O‘zbekiston tarixda ushbu musobaqada g‘olib bo‘lgani, qolaversa, turli yoshdagi terma jamoalarimiz qit’a miqyosidagi musobaqalarda munosib ishtirok etib kelayotgani aytildi. Los-Anjeles Olimpiadasiga tayyorgarlik olib borayotgan terma jamoamiz uchun ushbu musobaqa ham muhim hisoblanishi ta’kidlandi.
— Barchangiz turli terma jamoalarimiz tarkibida Osiyo kubogida ishtirok etgansiz, bu kabi musobaqalar katta tajriba hisoblanib, keyingi faoliyatingizga ham ta’sir qiladi. Vatan terma jamoasining libosini kiyib maydonga tushish katta sharaf. Bir jamoa bo‘lib, ahillik bilan musobaqada munosib ishtirok etishingizga ishonamiz, — dedi O‘FA birinchi vise-prezidenti Ravshan Irmatov.
Eslatib o‘tamiz, U-23 terma jamoamiz musobaqaning C guruhidan o‘rin olgan bo‘lib, Filippin, Quvayt va Vyetnamga qarshi bahs olib boradi. Turnirdagi ilk uchrashuvimiz 15 sentyabr kuni Filippinga qarshi bo‘lib o‘tadi.
