Xalqaro boks statistikasi va reytinglarini yurituvchi nufuzli BoxRec platformasi havaskor bokschilarning vazn toifasidan qat’i nazar eng kuchli sportchilari (P4P) reytingini yangiladi. Unga ko‘ra, o‘zbekistonlik bokschi Abdumalik Xalokov 1-o‘rinni egallab turibdi.

26 yoshli bokschi -60 kg vazn toifasida 112 marta jang o‘tkazib, ularning 101 tasida g‘alaba qozongan, 11 ta bahsda imkoniyatni boy bergan. U Olimpiada, Jahon va Osiyo chempionati hamda osiyo o‘yinlarida zafar quchgan kam sonli bokschilardan biri hisoblanadi.

Reytingning kuchli o‘nligidan yana uch nafar o‘zbekistonlik charm qo‘lqop ustasi joy olgan:

Fazliddin Erkinboyev — 5-o‘rin (57 g‘alaba, 3 mag‘lubiyat, 21 yosh);

To‘rabek Xabibullayev — 8-o‘rin (62 g‘alaba, 8 mag‘lubiyat, 22 yosh);

Asadxo‘ja Mo‘ydinxo‘jayev — 10-o‘rin (69 g‘alaba, 10 mag‘lubiyat, 25 yosh).

Shuningdek, kuchli beshlikdan Rossiya va Ukraina vakillari joy olgan. Rossiyalik Muslim Gajimagomedov 2-o‘rin, Vsevolod Shumkov 3-o‘rin va ukrainalik taniqli bokschi Oleksandr Xijnyak 4-o‘rinni band etgan.

Ma’lumot uchun, Xitoyning Guiyang shahrida World Boxing tashkiloti kubogi bahslarining ikkinchi bosqichi bo‘lib o‘tdi. Musobaqada 40 davlatdan 177 nafar erkak va 123 nafar ayol bokschi g‘oliblik uchun bahs olib bordi. Unda O‘zbekiston erkaklar terma jamoasi to‘liq tarkibda — 10 ta vazn toifasida, ayollar jamoasi esa 9 ta vazn toifasida ishtirok etdi. Yakunda ular 4 ta oltin, 3 ta kumush va 4 ta bronza medaliga sazovor bo‘ldi.

Unda buxorolik bokschi -60 kg vazn toifasida oltin medalni qo‘lga kiritgandi. Bundan tashqari, -90 kg vazn toifasida To‘rabek Xabibullayev ham barcha raqiblarini mag‘lub etib, birinchi o‘rinni egallagan.