«Arsenal» bosh murabbiyi Mikel Arteta futbolchilar bilan ishlashda qo‘llaydigan noodatiy usullari haqida gapirdi.

Shu hafta «kanonirlar» Chempionlar ligasidagi o‘yin uchun Neapolga uchish oldidan reys kechikishiga duch keldi. Artetaning aytishicha, u futbolchilarni shunday vaziyatlarga tayyorlash maqsadida mashg‘ulot jarayonida ataylab ayrim qiyinchiliklarni yuzaga keltiradi.

«Menga bunday sinovlar yoqadi. Mavsumoldi tayyorgarlik paytida shunga o‘xshash holatlarni ataylab tashkil qilishga harakat qilaman, toki jamoada bunday tajriba bo‘lsin.

Poyezd kechiksa yoki reysga kech qolsak, jamoa va murabbiylar shtabi vahimaga tushishini istamayman. Vaziyatga moslashish, shikoyat qilmaslik va bahona qidirmaslik kerak.

Biz ataylab ovqatlanish vaqtini kechiktiramiz, transportni ushlab turamiz, yo‘nalishlarni o‘zgartiramiz, kiyinish xonasini issiq qilib qo‘yamiz, hatto karavotlar sonini kamaytiramiz. Bularning barchasi turli sharoitlarga moslasha olishimiz uchun qilinadi.

Eng muhimi, o‘yin kuni jamoa uchun hech qanday kutilmagan holat bo‘lmasligi kerak», — dedi Arteta matbuot anjumanida.

Shanba kuni «Arsenal» Angliya Premyer-ligasi doirasida safarda «Sanderlend»ga qarshi maydonga tushadi.