«An-Nasr» bosh murabbiyi Ange Postekoglu Krishtianu Ronaldu manziliga aytilgan tanqidlarni asossiz deb hisobladi.

41 yoshli portugaliyalik futbolchi OFK Chempionlar ligasida «Al-Ayn»ga qarshi o‘yinda jamoasini 0:4 hisobidagi yirik mag‘lubiyatdan qutqarib qola olmadi.

O‘yindan keyingi matbuot anjumanida jurnalist Postekogluga quyidagi savolni berdi:

«Ronaldu — buyuk futbolchi, men uni juda hurmat qilaman. Ammo uning maydonda bo‘lishi hozir ham jamoaga foyda keltiryaptimi?»

Postekoglu bunga shunday javob berdi:

«Krishtianu allaqachon uchta gol urdi. Uning mavsumoldi tayyorgarligi ham qisqartirilgan edi. Gap umuman futbolchilarda emas. Ulardan nima talab qilingan bo‘lsa, hammasini bajarishdi. Mas’uliyat mening zimmamda, tushunarlimi? Shunday buyuk faoliyat qurgan va hozir ham barchaga namuna bo‘lib kelayotgan inson haqida bunday gapirish kerak emas. Meni tanqid qilishingiz mumkin — muammo yo‘q».

Shundan so‘ng jurnalist:

«Ammo biz uning o‘tmishdagi xizmatlari haqida emas, hozirgi holati haqida gapiryapmiz. Ronaldu hali ham yuqori saviyada o‘ynayaptimi?» — deb so‘radi.

Postekoglu esa:

«U uchta gol urmadimi? Bugun ham gol urishi mumkin emasmidi?» — deya javob qaytardi.

Jurnalist Ronaldu so‘nggi uchta o‘yinda hech narsa qila olmaganini aytganidan keyin, avstraliyalik mutaxassis:

«Ronaldu hech narsa qilmadimi? Siz boshqa o‘yinni ko‘rganga o‘xshaysiz», — dedi.

Krishtianu Ronaldu joriy mavsumda 7 ta o‘yinda maydonga tushib, 3 ta gol urgan.