"Xorazm" klubi bosh murabbiyi Vali Sultonov O‘zbekiston kubogining nimchorak final bosqichi doirasida bo‘lib o‘tgan OKMKga qarshi o‘yin borasida o‘z fikrlarini bildirib o‘tdi.

— O‘yin haqida fikringiz?
— Uchrashuv juda chiroyli va qiziqarli kechdi. Avvalo, Olmaliq jamoasini g‘alaba bilan tabriklayman. Ba’zan chempionatda ham bunday qiziq o‘yinni ko‘rmasligimiz mumkin. Bir so‘z bilan aytganda, muxlislarga yoqadigan futbol kechdi, desa bo‘ladi.

— Bundan 13 kun avval «Xorazm» shu stadionda OKMK mehmoni bo‘lgandi. Albatta, shu o‘yinni ham ko‘rib chiqqan bo‘lishingiz tabiiy. O‘sha bahs bilan solishtirganda nimalarni o‘zgartira oldingiz?

— To‘g‘ri savol berdingiz. Jamoani kecha qabul qilib oldim va endi birinchi mashg‘ulotni o‘tkazdik. Bugun esa Kubokda rasmiy uchrashuvda maydonga tushdik. Afsus, to‘liq tarkib bilan o‘ynay olmadik, 6–7 nafar futbolchimizda jarohat bor va ular uyda qolishgan. Ko‘rsatilgan o‘yin uchun futbolchilarga rahmat aytaman, oxirigacha kurash olib bordik.

Mirjalol Qosimovni juda hurmat qilaman, buni ko‘pchilik biladi. U kishini o‘zimga ustoz deb hisoblayman. «Shogird ustozdan o‘tmasa, shogird emas», deyishadi-ku, bugun shunga yaqin kelgandik. Olmaliq jamoasiga O‘zbekiston Kubogida omad tilab qolaman.