Matbuotda Kilian Mbappe va Usman Dembele o‘rtasida munosabatlar taranglashgani haqida xabarlar tarqalgan edi. Aytilishicha, Dembelega Mbappening matbuotda aytgan ayrim gaplari yoqmagan. Kilian ushbu mavzuga munosabat bildirdi.
«Men bu haqda Dembele bilan allaqachon gaplashganman. Hech qanday taranglik yo‘q, u mening do‘stim. Aslida hech qanday muammo mavjud emas, men mutlaqo xotirjamman. Shunchaki Millatlar ligasi va Fransiya terma jamoasi o‘yinlari paytida doim muhokama uchun qandaydir mavzu topish kerak bo‘ladi — ular ham shu mavzuni topishdi», dedi Mbappe.
25 sentyabr, juma kuni Fransiya terma jamoasi Millatlar ligasi doirasida Turkiyaga qarshi safar uchrashuvini o‘tkazadi.
