Turinning «Yuventus» klubi braziliyalik yarim himoyachi Duglas Luis vakillari bilan muzokara boshladi. Klub futbolchi bilan hamkorlikni uzaytirishga qaror qilgan. Bu haqda insayder Nikolo Skira ma’lum qildi.
Duglas Luis 2024 yil yozida «Aston Villa»dan «Yuventus»ga kelib qo‘shilgan edi. Uning turinliklar bilan amaldagi shartnomasi 2029 yil iyun oyi oxiriga qadar mo‘ljallangan.
Braziliyalik futbolchi joriy mavsumda «Yuventus» safida 6 ta o‘yinda maydonga tushdi, ammo gol yoki golli uzatma bilan ajralib turmadi.
Italiya chempionatining dastlabki besh turidan so‘ng «Yuventus» 10 ochko jamg‘arib, turnir jadvalida yettinchi o‘rinni egallab turibdi.
