Sloveniya terma jamoasi bosh murabbiyi Boshtyan Sesar «Manchester Yunayted» hujumchisi Benyamin Sheshkoni qo‘llab-quvvatladi.

Sheshko oyoq qismidagi jarohat sabab APLning 5-turida «Fulxem»ga qarshi 1:1 hisobida yakunlangan uchrashuvni o‘tkazib yuborgan edi. Shundan so‘ng «Manchester Yunayted»ning sobiq futbolchilari Ueyn Runi, Pol Skoulz va Nikki Batt uni tanqid qildi.

«Bunday klubda o‘ynasang, tanqiddan qochib bo‘lmaydi. Bu jarayondan faqat Beni emas, boshqalar ham o‘tadi. U sog‘lom bo‘lib, gol urayotgan paytda bunday ayblovlar yo‘q edi.

Albatta, u professional. Menimcha, bunday gaplarga e’tibor bermaydi. U vaziyatga ijobiy qarashi va atrofida to‘g‘ri insonlar bo‘lishiga e’tibor qaratishi kerak.

Hozir Benyamin uchun oson emas. U faoliyatida murakkab davrni boshdan kechiryapti, chunki avval jarohatlar bilan jiddiy muammoga duch kelmagan. Bu noodatiy jarohat va uning bitishi uchun vaqt kerak.

Hozir u ishonadigan va suyana oladigan insonlar bilan birga bo‘lishi juda muhim», — dedi Sesar.