Portugaliya terma jamoasining Norvegiya ustidan 2:1 hisobidagi g‘alabasida 56-daqiqada Konseysau o‘rniga maydonga tushgan Rafael Leau uchrashuvdan keyin matbuot vakillari bilan suhbatlashdi.

«Milan»ning sobiq hujumchisi fursatdan foydalanib, yozda «Galatasaroy»ga amalga oshirgan transferi haqida ham fikr bildirdi.

«Jorje Jezush meni yaxshi biladi va qaysi pozisiyada o‘ynashimdan qat’i nazar, bor kuchimni beraman. U menga o‘z fazilatlarimdan maksimal foydalanishda yordam berishiga ishonaman. Murabbiy jamoaga himoyada katta barqarorlik olib keldi. Raqib to‘pga ko‘p egalik qildi, biz esa himoyada ixcham harakat qila oldik. Muhim o‘yinlarda farqni yuzaga keltirish uchun bizga aynan shu narsa kerak edi. Har safar maydonga tushganimda, qo‘limdan kelgan barcha ishni qilishga harakat qilaman».

«Men mavsumoldi tayyorgarligini o‘tamadim. Hozir eng yaxshi jismoniy holatimga qaytishga harakat qilyapman, ammo jamoaga yordam berishga doimo tayyorman. Terma jamoamizda juda yuqori saviyadagi futbolchilar bor. Barcha o‘yinchilar tayyor va murabbiy ularni farqni yuzaga keltira oladigan pozisiyalarda o‘ynatyapti. Joau Feliks ham shunday futbolchilardan biri. Men u uchun xursandman, unga befarq emasman. U juda ko‘p tanqidga uchradi, hozir esa o‘z saviyasini ko‘rsatib, natijaga ta’sir qilyapti».

«Turkiya chempionati juda raqobatbardosh. U yerda katta nomlar bor va liga meni ijobiy ma’noda hayratga soldi. «Galatasaroy» meni juda qattiq xohladi, men esa jamoaga tez moslashdim. O‘ylashimcha, biz ajoyib ishlar qila olamiz. Men baxtliman va katta natijalarga erishish niyatidaman», — dedi Leau.