Angliya Premyer-ligasi bosh ijrochi direktori Richard Masters mustaqil komissiyaning "Manchester Siti"ni liganing moliyaviy qoidalarini buzganlikda aybdor deb topishiga munosabat bildirdi.
"Bu ish va qabul qilingan qaror Angliya Premyer-ligasi tarixidagi eng muhim voqealardan biri hisoblanadi. Hali ayrim masalalar hal qilinishi kerak. Ular orasida eng muhimi — qoidabuzarliklar uchun qanday sanksiyalar qo‘llanilishi masalasi", — deya Mastersning so‘zlarini APL rasmiy sayti keltiradi.
29 sentyabr kuni mustaqil komissiya "Manchester Siti"ni 2009/10 mavsumidan 2017/18 mavsumigacha bo‘lgan davrda moliyaviy qoidalarni buzish bilan bog‘liq barcha ayblov bandlari bo‘yicha aybdor deb topdi.
"Shaharliklar" 2 oktyabrga qadar apellyasiya berib, qaror ustidan shikoyat qilishlari mumkin.
