"Everton" himoyachisi Vitaliy Mikolenko Ukraina terma jamoasining Millatlar ligasida Shimoliy Irlandiyaga qarshi o‘yinida maydonga tushmaydi. Bu haqda Metro xabar berdi.

27 yoshli futbolchi Vengriyaga qarshi 1:0 hisobida yakunlangan uchrashuvni to‘liq o‘tkazdi, ammo Gruziya bilan 0:0 hisobidagi bahsda ishtirok etmadi.

Ukraina terma jamoasi bosh murabbiyi Andrea Maldera Mikolenkoda oyoq bilan bog‘liq muammo yuzaga kelganini va murabbiylar shtabi uning sog‘lig‘i bilan tavakkal qilmaslikka qaror qilganini ma’lum qildi.

"Biz uni hurmat qilamiz va yanada jiddiy jarohat olishini istamaymiz", — dedi murabbiy.

Ukraina va Shimoliy Irlandiya o‘rtasidagi uchrashuv 2 oktyabr kuni bo‘lib o‘tadi.

Mikolenko joriy mavsum Angliya Premyer-ligasida "Everton"ning barcha beshta uchrashuvini asosiy tarkibda boshlagan.