«Napoli» yarim himoyachisi Skott Maktominay kelasi yozda klubni tark etishi mumkin. Bu haqda TuttoMercatoWeb xabar berdi.
30 yoshli shotlandiyalik futbolchining «Napoli» bilan shartnomasi 2028 yilga qadar amal qiladi. Agar tomonlar kelishuvni uzaytirish borasida bir to‘xtamga kela olmasa, futbolchi sotilishi yoki keyinchalik erkin agent sifatida klubni tark etishi mumkin.
Maktominay yiliga taxminan 8 million yevro maosh olishni istamoqda. Bu miqdor «Napoli» prezidenti Aurelio de Laurentis taklif qilishga tayyor bo‘lgan maoshdan yuqori. Shu sababli shartnomani uzaytirish ehtimoli past baholanmoqda.
«Napoli» yarim himoyachini 25–30 million yevroga baholamoqda. O‘tgan yozda unga «Manchester Yunayted» va «Aston Villa» qiziqish bildirgan edi.
Ayni paytda Maktominay yuragida o‘tkazilgan kichik jarrohlik amaliyotidan so‘ng tiklanmoqda. Futbolchi asta-sekin mashg‘ulotlarga qaytmoqda.
