Italiya terma jamoasining sobiq himoyachisi Marko Materassi 2006 yilgi jahon chempionati finalida Fransiyaga qarshi o‘yinni esladi. O‘sha bahsda gol urgan va Zinedin Zidanning chetlatilishiga sabab bo‘lgan epizod ishtirokchisiga aylangan Materassi raqib juda kuchli jamoa bo‘lganini ta’kidladi.

«2006 yilgi jahon chempionatida biz go‘yo o‘zga sayyoraliklarga qarshi o‘ynagandek edik. Ammo, bilasiz, futbolda har doim ham kuchli jamoa g‘alaba qozonavermaydi», — dedi Materassi Trentoda o‘tkazilgan Sport festivalida.

Sobiq himoyachi 2010 yilgi Chempionlar ligasi finalini ham esladi. O‘sha uchrashuvda «Inter» «Bavariya»ni 2:0 hisobida mag‘lub etgan edi.

«Chempionlar ligasi finali oldidan Mourinyodan «Ular qanday jamoa?» deb, «Bavariya»ni nazarda tutgan holda so‘radim. U esa: «Xotirjam bo‘l, sen maydonga tushasan, biz 2:0 hisobida g‘alaba qozonamiz», deb javob berdi».