"Arsenal" 60 704 tomoshabinga mo‘ljallangan "Emireyts" stadioni sig‘imini oshirish imkoniyatlarini o‘rganib chiqqanidan so‘ng, uni katta miqyosda kengaytirish rejasidan voz kechdi. Bu haqda Evening Standard xabar berdi.

Klub endi stadionni bosqichma-bosqich rivojlantirish va takomillashtirishga e’tibor qaratishga qaror qildi.

Yirik rekonstruksiya ishlari "Arsenal"ni ma’lum muddat uy uchrashuvlarini boshqa stadionda o‘tkazishga majbur qilishi mumkin edi. Mikel Arteta qo‘l ostida jamoa muvaffaqiyatli davrni boshdan kechirayotgan bir paytda klub bunday ssenariyni maqbul deb hisoblamayapti.

Shu bois "Arsenal" endi stadion sig‘imini keskin oshirishdan ko‘ra, o‘yin kunlari muxlislar uchun sharoit va taassurotlarni yaxshilashni ustuvor vazifa sifatida belgilaydi.

Avval "Clock End" sektorida joriy qilingan xavfsiz tik turib tomosha qilish zonalari kelasi mavsumdan "North Bank"ning ayrim qismlariga ham kengaytiriladi.

Shuningdek, klub stadion ichidagi 5G mobil aloqa qamrovini yaxshilash ustida ishlamoqda. Bu boradagi ishlar mavsum yakuniga qadar sezilarli darajada ilgarilashi kutilmoqda.