Shvesiyalik himoyachi Emil Xolm juma kuni ertalab o‘ng son orqa qismi mushagi payini tiklash bo‘yicha jarrohlik amaliyotini boshdan kechirdi.
Operasiya Finlyandiyada o‘tkazildi. Uni professor Lasse Lempaynen «Bolonya» klubi shifokori Luka Bini ishtirokida amalga oshirdi.
Futbolchi reabilitasiya dasturini boshlashdan oldin ma’lum muddat uy sharoitida dam olish tartibiga amal qiladi. Italiya klubi matbuot xizmati xabariga ko‘ra, Xolmning tiklanishi taxminan 4 oydan 6 oygacha davom etishi kutilmoqda.
Eslatib o‘tamiz, ayni paytda «Bolonya»ning A Seriyadagi ishlari yaxshi ketmayapti. Jamoa turnir jadvalida 18-o‘rinni egallab turibdi.
