"Betis" yarim himoyachisi Dani Sebalyos o‘tgan yozda Madridning "Real" klubini tark etish qarori haqida gapirdi.
"Men gaplashgan deyarli barcha odamlar "Real" bilan shartnomamning so‘nggi yilidan voz kechganim uchun meni aqldan ozgan deb o‘ylashdi.
Menga munosib variant paydo bo‘lguncha kutishim kerakligini aytishdi. Ammo men "Real" oldida o‘zimni qarzdor his qilardim va o‘n yil davomida menga juda ko‘p narsa bergan klubga hurmat ko‘rsatishim shart edi.
Bu bobni bir umrga yopish vaqti kelgandi", — dedi Sebalyos PTV Sevilla telekanalidagi Zona Deporte dasturiga bergan intervyusida.
Joriy mavsumda 30 yoshli yarim himoyachi Ispaniya chempionatida uchta uchrashuvda maydonga tushdi, ammo gol yoki golli uzatma bilan ajralib turmadi.
Sebalyosning "Betis" bilan amaldagi shartnomasi 2029 yilning o‘rtalariga qadar mo‘ljallangan.
