"Andijon" jamoasi O‘zbekiston Superligasi 23-turi doirasida "Buxoro"ga qarshi o‘tkaziladigan uchrashuv oldidan so‘nggi tayyorgarlik mashg‘ulotini o‘tkazdi.

9 oktyabr kuni Buxoroda bo‘lib o‘tadigan bahs arafasida jamoa tarkibida bir qator yo‘qotishlar mavjud.

Gruziyalik futbolchi Aleksandr Andronikashvili jarohatini o‘z yurtida davolashda davom etmoqda. Imeda Ashortiya ham jarohati sabab ayni paytda muolaja olmoqda.

Aziz Turg‘unboyev va Muhammadkarim Toirov esa jarohatidan tiklanish jarayonini boshlagan. Ular individual tiklanish mashqlarini bajarmoqda, biroq hozircha uchrashuvda ishtirok etish uchun to‘liq tayyor emas.

Shuningdek, serbiyalik himoyachi Nemanya Chalasan ham Buxorodagi bahsni o‘tkazib yuboradi. Uning sariq kartochkalari soni to‘rttaga yetgani sabab futbolchi navbatdagi turda maydonga tusha olmaydi.

Bugun "Andijon" futbolchilari klub qarorgohida safar oldidan yakuniy mashg‘ulotni o‘tkazdi. Jamoa kechki payt Buxoroga yo‘l oladi.

Eslatib o‘tamiz, "Buxoro" — "Andijon" uchrashuvi 9 oktyabr kuni soat 19:00 da boshlanadi.