O‘zbekiston Superligasining 23-turi doirasida OKMK o‘z maydonida "Navbahor"ni qabul qildi. Olmaliqda kechgan uchrashuv 2:2 hisobidagi durang bilan yakunlandi.

Mezbonlar bahsni juda faol boshladi. 2-daqiqada Ahmadullo Muqimjonov Asadbek Sobirjonovning uzatmasidan so‘ng hisobni ochdi.

Birinchi bo‘lim yakuniga yaqin "Navbahor" muvozanatni tikladi. 40-daqiqada Islombek Mamatqozin Diyor Xolmatovning uzatmasini golga aylantirib, hisobni 1:1 ko‘rinishiga keltirdi.

Ikkinchi bo‘limning 68-daqiqasida Nodirbek Abdurazzoqov OKMKni yana oldinga olib chiqdi — 2:1.

Uchrashuvning so‘nggi daqiqalari esa haqiqiy dramaga aylandi. 90+6-daqiqada "Navbahor" futbolchisi Vanya Ilich penaltidan foydalana olmadi. Oradan ko‘p o‘tmay, VAR tekshiruvidan so‘ng gol bekor qilindi.

Shunga qaramay, namanganliklar oxirigacha kurashdi va 90+14-daqiqada Shohruh Abdurahmonovning penaltidan kiritgan goli evaziga hisobni tenglashtirdi — 2:2.

Shu tariqa, "Navbahor" 23 uchrashuvdan keyin 45 ochko bilan uchinchi o‘rinda qoldi. OKMK esa ochkolari sonini 36 taga yetkazdi.

Superliga, 23-tur

OKMK — "Navbahor" — 2:2

Gollar: Ahmadullo Muqimjonov, 2; Nodirbek Abdurazzoqov, 68 — Islombek Mamatqozin, 40; SH. Abdurahmonov, 90+14.