“Шўртан” ва “Сўғдиёна” учрашувидан кейинги матбуот анжуманида мезбонлар бош мураббий қуйидаги фикрларни билдириб ўтди.
- Гарчи, мавсумнинг иккинчи тури бўлса-да, ўз мухлисларимиз - ғузорликлар олдида биринчи учрашувда майдонга тушганлигимиз учун йигитларда бироз ҳаяжон сезилди. Шунинг учун ўйиннинг дастлабки дақиқаларидан ташаббусни қўлга олсак-да ва бир нечта хавфли вазиятлар яратган бўлсак-да, уларни самарали якунлашда аниқлик етишмай қолаверди. Шукрки, ҳаммаси яхши якун топди. Лекин шу ўринда таъкидлашим керакки, йирик ҳисобда ютган бўлсак-да, ғалаба осонликча қўлга киритилмади. Рақибни ҳам ҳурмат қилган ҳолда уларнинг кучига етарлича баҳо бериш зарур.
- Сиз захира кучларидан унумли фойдаландингиз. Айтингчи, футболчиларни алмаштиришда бирор бир ҳолатга эътибор қиласизми?
- Ҳар бир мураббийнинг ўйин давомида ўз захираси, сири ва яширин қуроли бўлади. Албатта, бундай имкониятлардан тўғри ва ўз вақтида фойланиш самара беради. Бугун ҳам шундай бўлди. Ғуломҳайдар Ғуломов майдонга тушиши билан гол урди. Виктор Клишин ҳам голли вазиятларни яратишда фаол ҳаракат қилди. Қолаверса, жароҳат олган Рустам Аъзамов ўрнига тушган Лазиз Убайдуллаев ҳам ишончимизни оқлади.
- Аъзамовнинг жароҳати нечоғли, у қачон сафга қайтади?
- Ҳозир бу тўғрисида аниқ гап айтиш қийин. Шифокорлар билан тезликда маслаҳатлашиб, уларнинг ташхисига қараб кейин бирор аниқ гап айтсак бўлади.