Навоийдаги баҳсдан сўнг ҳар икки жамоа вакиллари матбуот анжуманида иштирок этишди.
Самвел БАБАЯН (“Пахтакор” бош мураббийи): - Ўйин жуда қизиқарли кечди. Рақибимиз курашчан жамоа, уларнинг иштиёқи жуда юқори. Майдон сифати ўта яхши эмасди, лекин характер ва жамоавий ўйин кўрсатган ҳолда ғалабага эришдик. Йигитлар яхши ўйин кўрсатишди. Бугун Махарадзе кичик жароҳат олгани сабабли беллашувни ўтказиб юборди.
Алимов ўзини собиқ жамоасига қарши баҳсда кўрсатишни хоҳлади. У фаол бўлишга интилди ва шу сабабли 2та сариқ карточка олиб, майдонни тарк этди. Баъзида катта иштиёқ ҳам шундай вазиятларга олиб келади. У Сергеевдан кучлироқ ўйин кўрсатса, кейин асосий таркибдан ўрин эгаллайди. Наврўз ҳали машғулотларда ишлаши керак. Унинг имкониятлари бор, Алимовни узоқ муддат учун таркибга жалб қилганмиз.