Англиянинг «Ливерпуль» яримҳимоячиси Раҳим Стерлинг келаётган ёзда арзонроқ нархда бошқа жамоага ўтиши мумкин. Бу ҳақда «Daily Mail» нашри хабар тарқатди.
Англия премьер-лигаси қоидаларига мувофиқ, 20 ёшли инглиз футболчиси шартномаси тугашидан бир йил олдин уни ўзи сотиб олиш ҳуқуқига эга. Стерлингнинг «Ливерпуль» билан амалдаги шартномаси 2017 йилнинг ёзида ниҳоясига етади.
Манбада ёзилишича, Стерлингнинг ҳафталик 35 минг фунт маоши ҳисобга олинган ҳолда у 2016 йилда ўз шартномасини 1,7 миллион фунт стерлингга сотиб олиш ҳуқуқини беради. Бу эса унинг янги жамоага ўтиши учун бонус деганидир.
Шунинг учун, «Ливерпуль» футболчини арзонга қўйиб юбориш фикридан қўрқиб, шу йилнинг ўзидаёқ 25 миллион фунт стерлингга бўлсада сотиб юбориши мумкин, дея қайд этади газета.
Эслатиб ўтамиз, Стерлингга ҳозирда Англиянинг «Манчестер Сити» ва «Челси» клублари қизиқиш билдирмоқда.
Олдинроқ, «Ливерпуль» футболчини 50 миллион фунтдан камига қўйиб юбормаслиги ҳақида хабарлар тарқалганди.