“Бунёдкор” – “Ан-Наср” учрашувидан олдин ташкил этилган матбуот анжуманининг иккинчи қисмида “қалдирғочлар” устози қатнашди.

- Тўғри, имкониятларимиз йўққа чиққан. Лекин бу билан биз тўхтаб қолмаймиз. Чиройли ўйин кўрсатиб, ишқибозларимизни хурсанд қилишга ҳаракат қиламиз, - деб гап бошлади Сергей Иванович.

- “Ан-Наср” устози очиқчасига ҳужумкор ўйин кўрсатамиз, деб таъкидлади. Сиз қандай ўйин кўрсатишни режалаштириб турибсиз?
- Қандай ўйнашимиздан кўра, яратилган вазиятларимизни голга айлантириш муҳимроқ. Албатта бизни ўз йўналишимиз ва ўйин услубимиз бор. Шундай экан, ўз йўлимиздан қайтмаймиз.

- Жамоанинг мақсади қандай?
- Мен бу сўзни 2025-маротаба такрорлаяпман. “Бунёдкор” футбол клуби ўтган йилдан бошлаб ёшларга ишонч билдиришга катта урғу бера бошлади. Осиё Чемпионлар лигаси, Ўзбекистон чемпионати ва кубоги учрашувларида ўз тарбияланувчиларимиз ҳисобига ғалаба қозонмоқчимиз. Ташқаридан катта маблағ эвазига олиб келинган футболчидан кўра, ўзимиз етиштирган футболчининг клубга бўлган меҳри ва муҳаббати кучлироқ, деб ўйлайман. Бизнинг асосий мақсадимиз – ёшларни тарбиялаш ва турли хил ёшдаги терма жамоаларга уларни тайёрлаш.

Хайрулла Каримов (“Бунёдкор” ҳимоячиси):
- Мураббийимиз айтиб ўтганидек, чиройли ўйин кўрсатишга ҳаракат қиламиз. Мухлисларимизга хурсандчилик улашишга бор кучимизни берамиз, - деб гап бошлади "Бунёдкор" сардори.

- Араб жамоаларига ўйнашнинг энг оғҳир томони нимада?
- Мен қийин жиҳатини кўрмаяпман. Ўз ўйинимизни намойиш қилсак, уларни бемалол юта оламиз. Меҳмондаги об-ҳаво бироз қийин аҳволга солиши мумкин. Лекин Тошкентда уларни ютишимизга ҳеч қандай тўсиқни кўрмаяпман.