“Бунёдкор” – “Ан-Наср” учрашувидан кейинги матбуот анжуманининг биринчи қисмида саудияликлар устози иштирок этди. Унга учрашувнинг энг яхши футболчиси деб топилган дарвозабон Абдуллоҳ Ал Эназий ҳамроҳлик қилди.

- Очиғини айтсам, баҳс жуда ҳам оғир бўлди. Кучли рақибга қарши баҳсда ғалаба қозондик. Уч очко олганимиздан хурсандман, шогирдларим ҳаракатларидан кўнглим тўлди. Шуни алоҳида таъкидлаб ўтмоқчи эдимки, “Бунёдкор” турнир жадвали жиҳатидан аутсайдер кўринса-да, ўйин жиҳатидан бундай деб бўлмайди. Шахсан менга жамоадан ҳар бир учрашувда омад юз ўгиргандек кўринди. Ҳозир ҳамма натижа учун ўйнамоқда. Бугун гол урганимиздан кейин орқа чизиқни мустаҳкамлашга ҳаракат қилдик. Чунки “Бунёдкор”га очиқ футбол таклиф қилганимизда балки гол ўтказиб юборармадик. Ғалабадан хурсандман. Кейинги босқичга чиқиш имкониятимиз бор, - дейди “Ан-Наср”нинг уругвайлик устози.

Абдуллоҳ Ал-Эназий ( “Ан-Наср” дарвозабони): 
- Учрашув қийин ўтди. Гуруҳ босқичидаги энг мураккаб баҳслардан бири бўлди, десам муболаға бўлмайди. “Бунёдкор” футболчилари қўриқлаган дарвозам томон бир неча хавфли зарбалар йўллади, вазиятлар яратди. Менга кўпроқ, ҳимоячиларимиз ёрдам беришди, деган бўлардим.