"Краснодар" клуби ўзининг расмий сайти орқали мухлислар иштирокида сўровнома ўтказиб, жамоанинг апрель ойидаги энг яхши футболчисини аниқлади. Унга кўра, уругвайлик ярим ҳимоячи Маурисио Перейра клубнинг якунланаётган ойдаги энг яхши ўйинчиси деб топилди.

900дан ортиқ иштирокчи қатнашган сўровномада Перейра 28 фоиз овоз тўплади. Одил Аҳмедов эса 17,8 фоиз овоз билан 2-ўринни банд этди. Учинчи ўрин эса Роман Широковга насиб этди (13,6%).

«Краснодар» апрель ойида 5та ўйин ўтказди ҳамда унда 4та ғалабага эришиб, 1та дуранг қайд этди: «Мордовия» (4:0), «Рубин» (2:1), «Кубань» (3:2), ЦСКА (1:1) ва «Локомотив» (1:0). Ушбу ўйинларда Перейра 4та гол уришга муваффақ бўлди.

Россия Премьер-лигасининг 25-туридан кейин «Краснодар» 2-поғонада бормоқда. Улар пешқадам «Зенит»дан 8 очкога ортда қолишмоқда. Краснодарликлар 4 май куни сафарда Туланинг «Арсенал» жамоасига қарши ўйнашади.