"Локомотив" кеча Осиё чемпионлар лигасининг 6-турида майдонга тушди. Сафарда бўлиб ўтган "Фулад" билан кечган баҳсда "темирйўлчилар" 0:1 ҳисобида ютқазиб қўйишди. Ўйиндан кейинги матбуот анжуманида қатнашган жамоа бош мураббийи Вадим Абрамов қуйидаги фикрларни билдириб ўтди.

Ўйин ҳақида
- Баҳсни яхши бошладик. Айниқса, биринчи таймда кўплаб имкониятларга эга бўлдик. Бироқ рақиб дарвозасига тўп кирита олмадик. Иккинчи таймда эса майдонда бироз тенг кураш кечди. Афсуски, ўйин охирларида гол ўтказиб юбордик. 80-дақиқадан кейин рақиб кўпроқ ҳужум қилди ва бунинг натижасида тўп киритишга муваффақ бўлди. Озгина чидаб турганимизда учрашув 0:0 ҳисобида якунига етарди.

Шароитлар ҳақида
- Бизни яхши кутиб олишди. Ташкилий ишлар ҳам жойида бўлди. Бунинг учун "Фулад" футбол клубига миннатдорчилик билдираман.

ОЧЛдаги иштирок ҳақида
- Албатта, мақсадимиз гуруҳдан чиқиш эди, аммо айрим хатолар сабаб охирги ўринда қолиб кетдик. Лекин бу билан тўхтаб қолмоқчи эмасмиз ва бундан кейин бор эътиборни ички чемпионат ҳамда Ўзбекистон Кубоги баҳсларига қаратамиз.