“Бавария” ҳужумчиси Томас Мюллер Чемпионлар Лигаси “Барселона”га қарши ярим финалнинг жавоб учрашуви олдидан жамоасининг йўқотадиган ҳеч нарсаси қолмаганини ва мюнхенликларнинг охиригача кураш олиб боришларини таъкидлаб ўтди. 

Форварднинг фикрича “Бавария” Мюнхенда рақибга муносиб жавоб қайтариши лозим. Эслатиб ўтамиз, биринчи ўйинда каталонияликлар Мессининг дубли ҳамда Неймарнинг голи эвазига йирик - 3:0 ҳисобидаги ғалабани тантана қилишганди.

– Ҳа албатта ҳисобдаги фарқ камроқ бўлганида яхши бўларди, бироқ шу ҳолатда ҳам жамоамиз кучли. Рақибга муносиб жавоб қайтаришимиз керак, – дея Мюллер сўзларини келтиради УЕФА расмий сайти. – Кўпроқ ҳужум уюштиришимиз ва ўз ўйинимизни топиб олишимиз лозим. “Барселона”нинг ҳужумдаги учлиги дарвозамизга катта ҳавф солиши мумкин. Уларга қарши ҳимояланиш ҳар доим ҳам қийин кечган. 

– Агар финалга йўл олсак, буни мўжиза деб эътироф қилсангиз ҳам майли. Йўқотадиган нарсамиз йўқ. Тўқнашув эртага бош ҳакамнинг финал ҳуштагидан кейин якунига етади.