Бугун Ўзбекистон ёшлар терма жамоаси (U20) бош мураббийи Равшан Ҳайдаров билан матбуот анжумани бўлиб ўтди. Шу йилнинг июнь ойида Янги Зеландияда бўлиб ўтадиган ёшлар ўртасидаги жаҳон чемпионати олдидан ёшларимиз устози журналистларнинг саволларига авоб қайтарди. Анжуманда, шунингдек жамоа сардори Жавоҳир Соҳибов ҳам иштирок этди.

Равшан Ҳайдаров: Тайёргарликни декабрдан бошладик. Олти йиғин давомида 14та ўртоқлик учрашуви ўтказдик. Иккита йиғин хорижда ташкил этилди. Жамоанинг асосини ЖЧга йўлланмани қўлга киритган йигитлар ташкил этди.

20 май куни Янги Зеландияга йўл оламиз. У ерда Панама билан ўртоқлик учрашуви ўтказамиз. Турнирда камида аввалги натижаларни такрорлшни мақсад қилганмиз. Олдимизга ярим финалга чиқиш мақсадини қўйганмиз.

Тайёргарлик жараёнида 40дан ортиқ футболчиларни кўриб чиқдик. Якуний таркибдан эса таркибга муносиблигини кўрсатганлар ўрин олди. Таркибдаги асосий йўқотиш - Жамшид Болтабоев. Бобур Давлатовни эса "Рубин" йиғинларимизга қўйиб юбормагани сабаб, таркибга киритмадик.

Рақибларни яхши ўргандик. Улар иштирокидаги ўйинлар ёзилган дисклари бизда бор. Ўйинларини таҳлил қилиб, шунга яраша тайёрландик.

Янги Зеландияга Дубай-Сидней-Велингдон йўналишида учамиз. Умумий ҳисобда 22 соат парвоз қилишимиз керак бўлади.

Руҳий тайёргарлик борасида иш олиб бордик. Ҳар йиғинга профессионал психологларни таклиф этдик. Улар йигитлар билан машғулотлар ўтказди.

"Оқтепа" билан ўйиндан кейин пеналтилар сериясини амалга ошириб, бу борада тайёргарлигимизни синаб кўришни аввалдан режалаштиргандик.

Тартибли ҳимояланишда камчиликларимиз бор. Назорат ўйинларида буни яхшилашга уриндик.

Жавоҳир Соҳибов: Йигитларнинг тайёргарлиги яхши. Мусобақанинг муҳимлигини барча йигитлар яхши тушуниб турибди. Сардор сифатида мени йигитларни ўзи танлашди. Ишонч учун раҳмат. Жамоада ички муҳит яхши.