Футбол бўйича Россия чемпионати 2-дивизионининг “Ғарб” зонасида иштирок этувчи Москва вилояти, Раменск шаҳрининг “Сатурн” жамоаси футболчилари “Химки” билан учрашув пайтида стадионга киритилмаган мухлисларига ўз миннатдорчиликларини билдирди.
Стадионнинг ижара муддати ўз ниҳоясига етгани сабабли “Сатурн” раҳбарияти ўйиннинг бекор қилинишини талаб қилди. Бироқ ўйин инспектори мухлисларни стадионга киритмаган ҳолда ўйинни ўтказишга рухсат берди. Натижада “Сатурн”нинг мингга яқин мухлислари стадионга кира олмади, бироқ улар майдон ташқарисидан ўз жамоаларини қўллаб-қувватлаб турди.
Жамоа ўз рақиби устидан 3:0 ҳисобида ишончли ғалабага эришгандан кейин футболчилар стадионга кириш дарвозаси ёнига бориб, ўз мухлисларига миннатдорчилик изҳор этди.
