Россия президенти Владимир Путин ФИФА президентлигида бешинчи марта қолган Йозеф Блаттерни сайловда қозонилган ғалаба билан табриклади. Бу ҳақда Кремлнинг расмий сайти орқали маълум бўлди.
“ФИФАни 17 йил давомида бошқариб, сиз мухлислар, мураббийлар ва ўйинчилар орасида обрў қозондингиз. Ишончим комилки, сизнинг ташкилий қобилиятларингиз ҳамда тўплаган тажрибангиз миллионлаб одамларни бирлаштирувчи биринчи рақамли спортни янада ривожлантириш, географиясини кенгайтиришда ёрдам беради”, – дейилади ҳужжат матнида.
Шунингдек, Путин Россия бундан кейин ҳам ФИФА билан ҳамкорликни давом эттиришини, бу айниқса 2018 йилги жаҳон чемпионати арафасида муҳимлигини таъкидлаб ўтди.
“Ишончим комилки, биз умумий меҳнатларимиз самараси ўлароқ ташкилий ва спорт нуқтаи назаридан ажойиб турнир ўтказамиз”, – деди Путин.
