"Динамо" - "Машъал" (0:1) учрашувидан сўнг матбуот анжуманининг биринчи қисмида меҳмонлар бош мураббийи Александр Хомяков иштирок этди ва фикрлари билан ўртоқлашди, деб ёзади "Машъал" клуби расмий сайти.

- Айни дамда оғир дамларни бошимиздан ўтказяпмиз" - дея гап бошлади Хомяков. Бу ўйингача майда бор-йўғи 2 очко қўлга киритдик. Ўйин қийин бўлди. Вазифа биринчи бўлимда гол уриш ва ҳимояда тартибли ўйин кўрсатиш эди. Чунки "Динамо" ҳеч қайси ўйиннинг иккинчи бўлимида гол ура олмаган. Иккинчи бўлимда омад биз томонда бўлди. "Динамо" имкониятларидан фойдалана олмади. Шогирдларимдан мамнунман.

- Ғалаба қозонган бўлсангизда, худди ўз ўйинингизни кўрсатолмагандек тасаввур қолдирдингиз.

- Сўнгги учрашувларда ғалаба қозонмаганимиз учун йигитлар босим остида. Бундай вазиятда ўзимизни қандай тутишни биладиган даражада тажрибали эмасмиз. Бизга ўтган мавсумдан кўра яхшироқ натижа қайд этиш вазифаси қўйилган. Ўйиндан қониқмадим. Рақиб жуда кўп имкониятга эга бўлди. Лекин олға қадам ташладик. Аммо баъзи нарсаларнинг устида ишлашимиз керак.

- Бугун "Машъал" учун оғир ўйин бўлдими?

- Ҳа. Гапингизга қўшиламан.  Мавсумдаги энг оғир ўйинни ўтказдик.

- "Динамо" собиқ футболчиси Абдулла Набиев айни дамда "Машъал"да майдонга тушмаяпти...

- Набиевда жиддий жароҳат бор. У ҳозирда даволанишда давом этяпти. Абдулла иккинчи даврада бизга ёрдам беради деб умид қиламан.