Европа Чемпионлар Лигаси финалига чиққан Туриннинг “Ювентус” клуби “Манчестер Юнайтед” ҳужумчиси Робин ван Персига қизиқмоқда, деб хабар бермоқда Daily Mail маълумотига асосланиб Sports.ru.
Турин клуби раҳбарияти манкунианликлар устози Луи ван Гал келаси мавсумда имконият бермаслиги тахмин қилинаётган 31 ёшли футболчини таркибга жалб этмоқчи.
Хабарга кўра, “МЮ” голландиялик форвард ўрнига бошқа бир ҳужумчи харид қилинса ван Персини қўйиб юборади. Тахминларга кўра “МЮ” “Наполи”дан Гонсало Игуаинни сотиб олмоқчи.
Эслатиб ўтамиз, “бьянконери” таркибида айни вақт “Юнайтед”нинг икки собиқ футболчиси Карлос Тевес ҳамда Патрис Эвра ўйнаб келмоқда.
