Бугун Куала Лумпур шаҳрида келаси йили Ҳиндистонда бўлиб ўтадиган ўсмирлар (U16) ўртасида Осиё чемпионатига қуръа ташланди. 45та жамоа 2014 йилги қитъа чемпионати натижалари асосида саватчаларга ажратилди ва қуръага тортилди.

Қуръа натижасига кўра, Темур Олимхўжаев бошчилигидаги Ўзбекистон ўсмирлар терма жамоаси "А" гуруҳидан ўрин эгаллашди. Шунингдек, бу гуруҳга Яман, Фаластин ва Мальдив ороллари терма жамоалари тушишди. Саралаш ўйинлари куз ойларида Фаластинда ўказилади.

Саралаш босқичида 11та гуруҳда ўйинлар ташкил этилади. Гуруҳ ғолиблари ва 2-ўринни эгаллаганлар орасида энг яхши кўрсаткичга эга бўлган 4та жамоа ОЧ йўлланмасига эга бўлади. Ҳиндистон терма жамоаси қитъа чемпионати мезбони бўлганига қарамай, саралаш босқичида иштирок этади ва улар қуръа натижасида "Е" гуруҳидан ўрин олишди (Эрон, Баҳрайн ва Ливан билан бирга). Ҳиндистон бу гуруҳда 1-ўринни эгалласа, 2-ўринни эгаллаган орасида бешинчи жамоа ҳам Осиё чемпионатининг финал босқичида иштирок этади.

Саралаш босқичида Бутан ўсмирлари иштирок этиш истагини билдирмаган бўлса, Индонезия ФИФА тақиқи туфайли қуръадан чиқариб ташланди.

Саралаш босқичи қуръа натижалари билан танишинг:

ҒАРБ МИНТАҚАСИ
"А" ГУРУҲИ: Ўзбекистон, Яман, Фаластин (мезбон), Мальдив ороллари
"В" ГУРУҲИ: Непал, Уммон, Қирғизистон (мезбон), Иордания
"С" ГУРУҲИ: Қatar (мезбон), Тожикистон, Ироқ, Туркманистон
"D" ГУРУҲИ: Саудия Арабистони, БАА, Покистон, Бангладеш (мезбон)
"Е" ГУРУҲИ: Эрон (мезбон), Баҳрайн, Ҳиндистон, Ливан
"F" ГУРУҲИ: Сурия, Кувайт (мезбон), Афғонистон, Шри-Ланка

ШАРҚ МИНТАҚАСИ
"G" ГУРУҲИ: Малайзия, Лаос, Филиппин, Шимолий Мариана ороллари, Шарқий Тимор
"H" ГУРУҲИ: КХДР, Таиланд, Сингапур, Камбожа
"I" ГУРУҲИ: Жанубий Корея, Хитой, Хитой Тайпейи, Макао
"J" ГУРУҲИ: Австралия, Вьетнам, Мьянма, Гуам
"K" ГУРУҲИ: Япония, Гонконг, Бруней, Мўғулистон