“Ювентус” ўз ҳужум чизиғини кучайтиришга жуда яқин турибди.
Sports.ru нинг Gazzetta dello Sport хабарига таяниб ёзишича, туринликлар “Манчестер Сити” билан форвард Стеван Йоветич хариди бўйича келишувга эришган.
Турин клуби черногориялик футболчига йилига 3,5 миллион евро маош ва бонуслар ваъда қилмоқда. Шунингдек, Йоветич Туринни Карлос Тевес кетганидан кейин бўшайдиган 10-рақамли футболкани олиши мумкин.
Лекин Tuttosport бу хабарни инкор қилган ҳолда “Ювентус” ёзги трансфер мавсумида “Челси” ҳужумкор ярим ҳимоячиси Оскар учун кураш олиб боришини ёзмоқда. Шу сабабли туринликлар дастлаб “Челси”нинг бразилиялик футболчининг трансфер нархи бўйича жавобни кутишади. Кейин Йоветич келишувини имзолашлари мумкин.
“Челси” Оскарни тахминан 35 миллион еврога баҳолаган, Йоветич эса “Юве”га 20 миллион еврога тушиши мумкин.
