"Атлетико" жамоасининг туркиялик ярим ҳимоячиси Арда Турон жамоа раҳбариятига бошқа жамоага ўтмоқчилиги ҳақида маълум қилган.   Хабар қилинишича, бу футболчи ўзига жамоа бош мураббийи Диего Симеоненинг ўйин услуби ва футболдаги қарашлари маъқул эмаслигини билдирган ҳамда шу сабабли "Атлетико"ни тарк этмоқчи.   У жамоа билан ҳеч қанақа муаммоси йўқлигини, мавжуд шартноманинг молиявий жиҳатларидан ҳам норози эмаслигини, бу бошқа жамоалар кўпроқ пул таклиф қилиши билан боғлиқ эмаслигини таъкидлаган.   "Атлетико" уни қўйиб юборишни истамайди, аммо футболчи қолишни истамаса унга қаршилик ҳам кўрсата олмайди.   Айни вақтда Туронга "Барселона", "ПСЖ" ва "Манчестер Юнайтед" жамоаларидан жиддий таклифлар мавжуд.   Маълумот учун, ушбу 28 ёшли футболчи ўтган мавсумда "Атлетико" билан Ла-лиганинг 28 ўйинида қатнашган ва 2та гол уриб, 4та голли узатмани амалга оширган.