Малайзия премьер-лигасида 13-тур учрашувлари ўтказилди.

Кеча ҳамюртларимиз Фарҳод Тожиев ва Садриддин Абдуллаевлар тўп сурадиган “Т-Тим” жамоаси “ПКНС” клубига қарши баҳс юритди. Кутилганидек мезбонларнинг устунлигида кечган мазкур матчда “Т-Тим” 3:1 ҳисобида ғалаба қозонди. Эътиборга молик жиҳати шундан иборатки, “Т-Тим” жамоаси киритган учала голга ҳам ҳамюртимиз Фарҳод Тожиев муаллифлик қилди. У хет-трик қайд этишга муваффақ бўлди.

Садриддин Абдуллаев ҳам мазкур учрашувда иштирок этди ва тўлиқ ўйнади.

Шу тариқа, “Т-Тим” ҳисобидаги очколар сони 13 та учрашувдан сўнг 32 тага етди. Жамоа турнир жадвалида ҳамон етакчилик қилмоқда.

Таъкидлаб ўтамиз, премьер-лига нуфуз жиҳатидан Малайзияда Супер лигадан кейинги иккинчи лига саналади.