29 ёшли франциялик ярим ҳимоячи Абу Диаби 9 йиллик жароҳатларга бой “Арсенал”даги даврини тугатди ва эркин агентга айланди. Футболчи охирги икки мавсумда “Арсенал” асосий таркибида атиги иккита учрашув ўтказган.
Кеча 30 июнь куни Диабининг “канонирлар” билан тузган шартномаси ўз якунига етди ва Арсен Венгер муаммолар гирдобидаги французни таркибда олиб қолмасликка қарор қилди.
“Арсенал” ўз расмий сайти орқали футболчига миннатдорчилик изҳор қилди:
“Диаби — жуда истеъдодли ярим ҳимоячи. Афсуски унинг майдондаги даври сурункали жароҳатлар сабаб қисқариб кетди”, - дейилади Лондон клубининг расмий сайтига асосланган Football.ua хабарида.
Диаби “Арсенал”га 2006-йил январида “Осер”дан келиб қўшилган ва ўтган 9 йил давомида барча мусобақларда лондонликлар асосий таркибида 180 ўйин ўтказди.
“Арсенал”да ўтган шу йиллар давомида Диаби жароҳатлар сабаб 225 ҳафтани футболсиз ўтказиб юборган. Француз умумий ҳисобда “канонирлар” сафида жами 39 марта жароҳат олган.
