"Саутгемптон" сўнгги йилларда кўҳна қитъанинг топ-клубларига янги юлдузларни тарбиялаб бериш билан ном қозонди.
Клубнинг ўз академиясида ёш футболчилар билан ишлаш ва уларни асосий таркибга жалб қилиш борасида ишни тўғри йўлга қўйгани бугунги муваффақиятларнинг бош мезонидир.
"Авлиёлар" оқилона сиёсат туфайли ҳам ҳозир молиявий тарафлама АПЛдаги энг барқарор жамоалардан бири бўлиб турибди. Хўш, агар "Саутгемптон" ўз юлдузларини сотмаганида, жамоа қандай кўриниш касб этган бўларди? Шак-шубҳа йўқки, "авлиёлар" совринли ўринлар ва Чемпионлар Лигаси йўлланмаси учун курашда иштирок этишарди.
Дарвозабон – Фрэйзер Форстер
"Саутгемптон"да – 2014 йилдан – ҳозирги вақтгача
Харид қилинган – 10 миллион фунт
"Саутгемптон"нинг XXI асрдаги энг қиммат ва шу билан бирга энг ишончли дарвозабони. Кипер дебют мавсумини ажойиб тарзда ўтказди, аммо мавсум охирида жиддий жароҳатга йўлиқди. Шу туфайли янги футбол мавсумининг муайян қисмини ўтказиб юборишга мажбур. "Саутгемптон" катта муаммолардан ўзини суғурта қилиш мақсадида аллақачон голландиялик Мартен Стекеленбургни ижарага олди.
Ўнг қанот ҳимоячиси – Натаниэль Клайн
"Саутгемптон"да – 2012-2015 й.й.
Ҳозир – "Ливерпул"да
Харид қилинган – 2.5 миллион фунт
Сотиб юборилган – 12.5 миллион фунт
"Саутгемптон" ушбу чаққон, тиришқоқ ва техник жиҳатдан юқори истеъдод эгасини бир неча йил муқаддам "Кристал Пэлас"дан 2.5 млн фунт эвазига сотиб олганди. Қисқа муддат ичида футболчи чемпионшип савиясидан Англия терма жамоаси даражасигача кўтарилди.
"Авлиёлар" эса одатга кўра уни "Ливерпул"га 5 баравар қимматга пуллашди.
Марказий ҳимоячи – Жозе Фонте
"Саутгемптон"да – 2010 йилдан – ҳозирги вақтгача
Харид қилинган – 0.8 миллион фунт
Ҳар қанча уринмасин "Бенфика" асосий таркибидан жой ола билмаган португалиялик футболчи бахтини Англиядан излади. Дастлаб "Кристал Пэлас", кейин эса "Саутгемптон"дан қўним топди.
"Авлиёлар" билан Биринчи Лигадан Премьер-Лигача бўлган йўлни босиб ўтиб, мунтазам равишда ўз ўйинини кучатийриб борди. Фонтенинг тиришқоқлиги ва меҳнатсеварлиги барибир ўз мевасини бермай қолмади. У деярли 31 ёшида илк бор Португалия терма жамоасига чақирилади ва бундан бироз олдинроқ "Саутгемптон" сардорига айланганди.
Марказий ҳимоячи – Деян Ловрен
"Саутгемптон"да – 2013-2014 й.й.
Ҳозир – "Ливерпул"да
Харид қилинган – 8.5 миллион фунт
Сотиб юборилган – 20 миллион фунт
"Саутгемптон"даги ягона ёрқин мавсумдан сўнг "Ливерпул"га ўтган футболчи ўз мавқейини бутунлай йўқотиб қўйди.
Ловрен 2013-2014 йилги мавсумдаги ишончли ўйини эвазига АПЛнинг энг кучли ҳимоячиларидан бири сифатида эътироф этилиб, ўз трансфер нархини икки баравар қимматлаштиришга эриша олганди.
Чап қанот ҳимоячиси – Люк Шоу
"Саутгемптон"да – 2011-2014 й.й.
Ҳозир – "Манчестер Юнайтед"да
Харид қилинган – 0 миллион фунт (ўзининг тарбияланувчиси)
Сотиб юборилган – 27 миллион фунт
Чап қанот ҳимоячиси бўлган Шоу худди Гарет Бэйл сингари майдонда фақат шу вазифа билан чекланиб қолишни истамайди.
Эпчил, юқори техникали ва ўз билганидан қайтмайдиган ўйинчининг кўп вазиятларда ҳимоядан кўра ҳужумда кўпроқ фойдаси тегади.
Жароҳати ва юқори трансфер нархига қарамай Шоу "МЮ"даги дебют мавсумини анча муваффақиятли тарзда ўтказди.
Марказий ярим ҳимоячи – Морган Шнайдерлин
"Саутгемптон"да – 2008 йилдан - ҳозирги вақтгача
Ҳозир – "Манчестер Юнайтед"га ўтишга яқин турибди
Харид қилинган - 1.2 миллион фунт
Рақиб ҳужумларини барбод қилиш бобида анча устаси фаранг бўлган франциялик марказий ярим ҳимоячи айнан "Саутгемптон"да клуб ўйинчиси дажарасидан терма жамоа футболчиси мавқейига етишди.
Футболчи нафақат стандартлар вақтида, балки ҳужумни ривожлантириш ва ҳатто уни якунлаш борасида ҳам анча фойдали ўйин кўрсатади.
Анча вақтдан бери АПЛ грандлари Шнайдерлинга қизиқиш билдириб келишади. Тез орада унинг "МЮ"га кўчиб ўтиши эҳтимоли юқори.
Марказий ярим ҳимоячи – Алекс Окслейд-Чемберлен
"Саутгемптон"да – 2010-2011 й.й.
Ҳозир – "Арсенал"да
Харид қилинган – 0 миллион фунт (ўзининг тарбияланувчиси)
Сотиб юборилган – 12 миллион фунт +
16 ёшида "авлиёлар" сафида дебютини ўтказган универсал ҳужумкор ярим ҳимоячи 17 ёшда асосий таркиб аъзосига айланди. Бир йилдан кейин эса у "Арсенал" билан шартнома имзолайди ва терма жамоа сафида Европа чемпионатида иштирок этади.
Шундан сўнг футболчининг ўсиш суръатлари бироз пасайганига қарамай Окслейд вақт ўтган сайин "Арсенал"даги муҳим фигуралардан бирига айланиб бормоқда.
Марказий ярим ҳимоячи – Адам Лаллана
"Саутгемптон"да – 2006-2014 й.й.
Ҳозир – "Ливерпул"да
Харид қилинган – 0 миллион фунт (ўзининг тарбияланувчиси)
Сотиб юборилган – 25 миллион фунт
У қадар британча фамилияга эга бўлмаган ярим ҳимоячи қадрдон клубидаги дебютини бундан деярли 10 йил аввал нишонлаганди. 2008 йили жамоанинг асосий таркибидан муқим жой олган Лаллана 2012 йилдан эътиборан "Саутгемптон" сардорига айланди.
Футболчининг "Ливерпуль" ва терма жамоа даражасида ҳозирча ёрқин ва ишонарли ўйин кўрсата олмаётгани ҳақиқат. Аммо унинг яқинда (майда) 27 ёшни қаршилаганини инобатга олсак, Лалланада ҳали вақт бор.
Ўнг қанот вингери – Тео Уолкотт
"Саутгемптон"да – 2005-2006 й.й.
Ҳозир – "Арсенал"да
Харид қилинган – 0 миллион фунт (ўзининг тарбияланувчиси)
Сотиб юборилган – 9.1 миллион фунт
Яна бир вундеркинд. 15 ёшида ёшлар жамоасида дебют қилган футболчи 17 ёшида ЖЧга бориб, шундан сўнг "Арсенал" футболчисига айланди.
Унинг Лондондаги фаолияти узоқ вақт жуда кўнгилли ва муваффақиятли тарзда кечди. Аммо Тео бундан аввалги мавсумда жиддий жароҳатга йўлиқиб, Бразилиядаги жаҳон чемпионатини ўтказиб юборди, сафга қайтгач эса "канонирлар" асосий таркибидаги ўрнидан ҳам қуруқ қолди. Аммо шундай бўлса-да, футболчи Премьер-Лиганинг сўнгги ўйинида хет-трикка эришди ва Кубок финалида тўп киритиб мавсумни юқори нотада якунлади.
Ҳужумкор ярим ҳимоячи – Гарет Бэйл
"Саутгемптон"да – 2006-2007 й.й.
Ҳозир– "Реал Мадрид"да
Харид қилинган – 0 миллион фунт (ўзининг тарбияланувчиси)
Сотиб юборилган – 7 миллион фунт
Уолкотт билан бирга ўсган Бейл "Арсенал"ни эмас, балки "Тоттенхэм"ни танлайди. Уэльслик йигитча "шпорлар" таркибида оддий қанот ҳимоячисидан ўта хавфли ҳужумкор ярим ҳимоячига айланди. Ўзининг юқори тезлиги, дриблинги ва ажойиб соч турмаги билан АПЛда порлаган футболчини тез орада Мадриннинг "Реал" клуби жуда катта маблағ эвазига ўз таркибига қўшиб олади. Шуни унутмаслик керакки, ушбу трансфер ҳозирги кунгача футбол тарихидаги энг қиммат трансферлигича қолмоқда.
Испанияда Бэйл нафақат футбол майдонида, балки ундан ташқарида ҳам ҳақиқий мегаюлдузга айланди.
Якунига етган мавсумда унинг ўйинида бироз пасайиш кузатилган ва Англияга қайтиши мумкинлиги тўғрисида миш-мишлар тарқалган бўлса-да, барибир "Реал" Гаретга ишонч билдиришда давом этмоқда. Бейлнинг бир ўзи Уэльс термасини Европа чемпионатига олиб чиқишга жиддий бел боғлаган.
Ҳужумчи – Рики Ламберт
"Саутгемптон"да – 2009-2014 й.й.
Ҳозир – "Ливерпул"да
Харид қилинган – 1 миллион фунт
Сотиб юборилган – 4 миллион фунт
Ламбертнинг мисолида инсон агар ўз устида тинимсиз ишласа, кун келиб албатта юқори марраларни забт этиши мумкинлигига ишонч ҳосил қиламиз.
Фаолиятининг катта қисмини учинчи-тўртинчи дивизионларда ўтказган футболчи 30 ёшида Премьер-Лигани забт этиши, терма жамоадан чақирув олиб, ЖЧга бориши ва болалигидан ўзи мухлислик қилган суперклубга ўтиб, Чемпионлар Лигасида тўп суриш бахтига муяссар бўлиши мумкинлигини ким ҳам ўйлабди дейсиз? Ҳа, бунақаси ҳар доим ҳам бўлавермайди.
Рики "Саутгемптон"да асосий вазифалардан бирини бажарарди, аммо "Ливерпуль" ва ЕЧЛда унинг ажойиб эртаги бахтли хотима топмади. Футболчи яна бир неча мавсум юқори савияда тўп суришни истаса, мавсум арафасида "Ливерпул"дан кетиши зарур.
Харажат қилинди – 24 миллион фунт
Фойда кўрилди – 116.6 миллион фунт +
Заҳира: Боруц, Чэмберс, Бертран, Панчон, Натан Дайер, Крауч, Пелле.
Маҳмуджон АЗИМОВ
таржимаси
