Россиялик бизнесмен Алишер Усмонов Россия футбол федерациясига берган қарзини кечиб юборишини ва Россия терма жамоаси бош мураббийи Фабио Капелло билан шартноманинг бекор қилиниши жараёнига ҳеч қандай алоқаси йўқлигини айтди.

“Мен Капелло билан шартноманинг бекор қилиниши ҳақидаги қарордан бехабарман. Мен фақатгина мураббий маошини ололмаётгани учун ёрдам беришга қарор қилганман. Ҳеч ким буни мендан сўрамаган, гап РФИда эмас. Мен ўз ишимни қилдим, қолганини буни қилиши керак бўлган одамлар ҳал қилади. Мен ўшанда қарз берган одамларим ҳозирда ўз лавозимларидан кетганлар, шунинг учун мен ҳеч кимдан қарзнинг қайтарилишини сўрамайман. Бу менинг РФИга ўз ишларини тўғрилаб олиши ва жаҳон чемпионатига муносиб равишда тайёргарликни таъминлашдаги ёрдамим бўлади”, деб таъкидламоқда Усмонов.

14 июлда Россия терма жамоаси бош мураббийи Фабио Капелло истеъфога чиқарилди. Италиялик мутахассисга тўланадиган тавон пули 930 млн рублни ташкил этди. 
Шу билан бирга, ўтган ҳафтада италиялик мутахассиснинг маоши бўйича барча қарзлар ва ҳаттоки йилнинг охиригача бўлган маоши ҳам тўлиқ тўлаб берилди.

Усмонов РФИга италиялик мутахассис олдидаги қарзини тўлаши учун февраль ойида 400 млн рубль, июнь ойида эса 300 млн рубль қарз берган эди. РФИ раҳбари лавозимини вақтинчалик бажараётган Никита Симонян Усмонов бу берилган маблағларни кечиб юборишига умид билдиришини айтган эди.